TEKS DRAMA BAHASA SUNDA

“PASANGGIRI BENCONG ROMBENG”

ADEGAN 1

Dina hiji poe anu caang mentrang ngahiliwir angin anu sepoy sepoy. Aya hiji pamuda anu keur kasmaran ku bakat bogoh pisan ka kabogohna.

Komar             : “Duh, my neng nuju naonnya ? meni sono kieu ka my neng. Ah... urang sms

    ah. Eh, henteu ah hoyong ngadangu sora my neng.” (Komar nelepon kabogohna)

Esih                 : “Halooo...”

Komar             : “Halooo my neng. Nuju naon ? Nuju dimana ? Nuju sareng saha ? Atos emam teu acan ? teu kenging hilap emam nya. Terus atos shalat teu acan ? teu kenging hilap oge nya”

Esih                 : “Calik. Di bumi. Nyalira. Atos. Enya. Atos. Enya” (bari tiis rarayna)

Komar             : “Oh sae atuh my neng alhamdulillah”

Esih                 : “Muhun. Aya naon ayang beb nelepon?”

Komar             : “Akang teh sono ka my neng”

Esih                 : “Neng oge sono pisan ka ayang beb”

Komar             : “Pependak yu my neng. Di tempat nu biasa we hehe”

Esih                 : “Hayu ayang beb. Kumaha mun jam dua ayang beb?”

Komar             : “Oke siap my eperiting, muaaaah”

ADEGAN 2

*Komar patepang sareng Esih di warung Ma Ecin.*

Komar             : “Ieu si neng kamana? Tos sajam ngantosan si eneng, kamana nya ?”

*Teu kungsi lami Esih datang.*

Esih                 : “Eh akang.....”

Komar             : “Eh eneng tos dongkap.”

Esih                 : “Atos lami ngantosanna?”

Komar             : “Ah henteu, akang oge nembe pisan dongkap. Padahal mah tatadi. (nyarios dina jero hate)”

Esih                 : “Sugan teh ti tadi hehe.”

Komar             : “My neng, ayang beb bade nyarios serius sareng my neng.”

Esih                 : “Nyarios naon ayang beb?

Komar             : “Ayang beb atos teu kiat” (bari nungkul ku sabab isin)

Esih                 : “Teu kiat naon beb? Neng mah alim ah” (bari ngajauh kasieunan)

Komar             : “Naon ari my eneng. Maksad akang mah akang teh atos teu kiat hoyong nulis nama neng di buku nikah”

Esih                 : “Hah?” (ngahuleng ku sabab reuwas)

Komar             : “Heh hoh. Enya akang teh hoyong gera nikah sareng my neng.”

Esih                 : “Mun enya ayang beb hoyong nikahkeun neng. Dongkap atuh ka bumi tepangan ema supados nyarios langsung ka ema”

Komar             : “Hayu atuh neng ayeuna!”

ADEGAN 3

            Komar jeung Esih langsung angkat nepangan ema na Esih kanggo nyarioskeun niat Komar anu bade nikahkeun Esih.

Esih                 : “Assalamualaikum. Emaaa”

Ema                 : “Waalaikumsalam. Eh budak ema atos uih. Ari ieu saha?” (bari ninggali Komar ti handap neupikeun ka luhur)

Komar             : “Assalamualaikum ma, kenalkeun abdi Komar kabogohna Esih” (bari salam ka ema)

Ema                 : “Hah? Ari Esih ti iraha gaduh kabogoh? Naha ema kakarek apal? Sok atuh kalebet heula, ngobrolna dilebet!”

*Langsung Komar, Esih jeung Ema caralik di ruang tamu*

Komar             : “Ema.. Maksad abdi nepungan ema teh sanes teu kirang sopan tapi abdi bade nyarios ka Ema Komar teh bade nikah sareng Esih.”

Ema                 : “Eleuh eleuh, kakara oge ema apal Esih gaduh kabogoh ayeuna atos hoyong nikah wae. Emang Komar gaduh naon bade nikahkeun anak ema?”

Komar             : “Nyaeta Ema, Komar teh sabenerna mah teu acan gaduh artos kangge nikah sareng Esih. Tapi Komar jangji Komar bade milarian heula acisna demi nikah sareng my neng.”

Ema                 : “Oh kitu, sok we heula Komar pilarian artosna. Upami atos aya Komar dongkap deui we kadieu!”

Komar             : “Muhun ma ari kitu mah siap.”

ADEGAN 4

Saparantos uih ti bumi Esih, pas nuju di jalan Komar pependak sareng Dayat.

Dayat              : “Komaaaaar!” (Ngagorowok tarik)

Komar             : “Eh Dayat, aya naon Yat?”

Dayat              : “Maneh ti mana?”

Komar             : “Ti imahna si Esih, urang teh hayang nikah jeung si Esih tapi urang bingung teu boga duit euy yat.”

Dayat              : “Kabeneran yeuh urang boga info. Yeuh  baca yeuh!” (bari ngasongkeun koran ka Komar)

Komar             : “Innalillahiwainnaillaihirojiun.”

Dayat              : “Eh naha Innalillahi? Tibalik ari maneh tah nu tukangna!”

Komar             : “Ari sia ieu mah acara pasanggiri keur awewe lain keur lalaki ! (Bari sesentakan ka Dayat). Tapi bae ketang asal urang boga duit. Lumayan hadiahna gede gening hehe”

Dayat              : “Tah kitu atuh, naon hesena kari nyamar jadi awewe hahaha”

ADEGAN 5

            Enjingna, Komar jeung Dayat siap-siap ngiringan audisi. Singkat carita Komar sareng Dayat lolos audisi. Teu di sangka Komar sareng Dayat lebet ka babak opat besar.

MC                  : “Assalamualaikum warrohmatullohi wabarokaaaaatuh. Papendak deui sareng sim kuring Citra Citato dina acara Pasanggiri Awewe Bohay !!! Seteuacan arurang ninggali penampilan para peserta anu kece-kece didieu aya tilu juri anu teu eleh kece na. Nu kahiji aya Syaaaaaahrisma. Nu kadua aya Saepul Jamilah. Nu katilu aya Ivan Gu... Gunaon sih?”

Ivan                 : “Guguruntulan !” (bari sewot ka MC)

MC                  : “Ohh hahaha. Langsung wae nya ka peserta nu kahiji. Urang tampilkeun Pira Kembang.”

*Pira nampilkeun pupuh*

MC                  : “Mana keprokna kanggo Pira Kembaaaang. Juri kumaha komentarna?”

Syarisma          : “Hai Pira Kembang. Uhh ulala pisan nyanyikeun eta pupuh. Meni sae sorana.”

Ivan                 : “Kostum anu di pake ku pira teu sesuai sareng tema laguna. Ongkoh syar’i tapi goyangna meni hot pisan hehe”

MC                  : “Oke, langsung ka peserta kedua. Urang sambut penampilan ti Dayatiningsih.”

*Dayat nampilkeun nyanyian diiringkeun ku gitar*

MC                  : “Sae pisan Dayatiningsih nyanyina neupikeun ngahiung ieu ceuli abdi. Langsung wae ka komentar juri, mangga Saipul Jamilah.”

Saepul             : “Edaaan, alus pisan mainkeun gitarna. Diajar ku saha?”

Ivan                 : “Alus ti belah mana na euy? Kostum na mah alus tapi sora jeung gitar mah fals.”

MC                  : “Nuhun komentarna para juri. Penampilan ka tilu aya Syahrima.”

*Syahrima nampilkeun nyanyian*

Syahrisma        : “Ehh naha eta mah jiplak pisan abdi, meni teu kereatip ih.”

Syahrima         : “Pan abdi ngafans pisan ka Syahrisma hehe”

Saepul             : “Ah biasa wae, geus mah nurutan salah deui. Fix Butut”

MC                  : “Waaaaw komentar nu luar biasa ti juri-juri. Nu terakhir ayeuna aya Komara Blazezskie.”

*Komar nampilkeun acting, Juri miwarang Komar acting kumaha kahoyong juri*

Saepul             : “Actingna biasa wae tapi lumayan lah katutupan ku geulis. Pantesna mah jadi model sanes artis”

Ivan                 : “Satuju ari geulis mah, baju na oge atos sae.”

MC                  : “Sadaya paserta atos nampilkeun bakatna masing-masing. Ayeuna waktosna ngumumkeun saha anu juarana. Siap penonton? Pemenangna nyaetaaaa Komara Blazenskie, selamat ka Tarama berhak menangkeun artos sanilai sapuluh juta rupiah”

*Teu kungsi lila saatos diumumkeun juarana jol Esih datang ka studi*

Esih                 : “(maledog Komar ku sandal capit) Ari akang nanaon aya di didieu? Ari akang jadi bencong? Isin Esih mah isin gaduh calon caroge anu kieu patut. Amit-amit mun caroge Esih teh banci. Atos ah neupi dieu we hubungan teh, muak Esih mah. Esih Akang end !” (Esih aambekan ka Komar ku bakat kacewa)

Komar             : “Esih ulah ninggalkeun akang. Akang teu bisa hirup tanpa Esih. Esihhhhh....”

MC                  : “Ohhh pamirsa, geuningan Komara Blazenskie teh lalaki. Berarti nu menangna nyaeta Syahrimaaa”

Komar             : “Ah aing mah kawin teu jadi, meunang duit teu jadi, nasib nasib !“